Esa lluz que naide nun mata (Premiu Narraciones Trabe)

El cuentu, la forma narrativa que meyor ta retratando la sociedá asturiana d'anguañu, tien nesti llibru ún de los mayores llogros d'estos años: doce relatos escritos con precisión milimétrica, con maxistral cenciellez, doce escenes de la vida cotidiana onde lo maravioso se miez cola realidá de cada día: un entierru, un insumisu presu, una pareya homosexual, un solitariu, un home qu'acostina una camaleona pelos bares..., situaciones o xente que podemos tropezar en cualesquier momentu, pero que nesti llibru algamen una rara intensidá que llogra fascinanos. Pablo Antón Marín Estrada (Sama, 1966), que llogró'l Premiu Trabe 1994 con esta obra, ye ún de los escritores más orixinales y capaces d'esta lliteratura.